ബാലി
പിന്നിൽ നിന്നമ്പെയ്തെൻ ഹൃദയം പിളർന്ന രാമാ
പറയൂ നീ, പടുമരണമെന്തിന്ന് ബാലിക്കു നൽകി നീ
പൊരുതിപ്പരാജിതനായൊരെന്നനുജനായ്
ചതിയെന്തിനായ് ചെയ്തു ദശരഥനന്ദനാ?
ജാനകിയെത്തേടി ലങ്കയിൽ പോകുവാൻ
രാക്ഷസരാജനെയെതിരിടുവാൻ
സുഗ്രീവസന്ധിയ്ക്ക് വേണ്ടിയാണോ?
അല്ലയോ രാമാ നിനക്കറിയാത്തതോ ?
രാവണരാജനെ വാലിൽ ചുരുട്ടിയിട്ടാഴിയേഴും
താണ്ടിയ ബാലിതൻ ചരിതങ്ങൾ
അല്ലയോ രാമാ നീ സന്ധി ചെയ്തില്ലല്ലോ?
വാനരരാജൻ ഈ ബാലിയോടൊപ്പമേ
എങ്കിലാ ലങ്കയെ മൊത്തമായ് നിന്നുടെ
മുന്നിലായ് കൊണ്ടങ്ങ് വച്ചേനെയീ കപി
ബാലിതൻ പോർവിളി കേൾക്കുന്ന മാത്രയിൽ
ലങ്കാധിപതിയായ രാവണരാക്ഷസൻ
പേടിച്ചണഞ്ഞേനെ രാമപാദത്തിലായ്
എന്തിനായ് രാമ നീ ചെയ്തു കൊടുംചതി ?
മായാവിയസുരനോടടരാടിയോരെന്നെ
കെണിയിൽപ്പെടുത്തിക്കടന്നോരനുജനായ്
എന്തിനായ് രാമ നീ ചെയ്തു കൊടുംചതി?
വരലബ്ധിയറിയുന്ന രാമനും ഭയമോ?
ബാലിക്കുമുന്നിൽ വന്നടരാടുവാനായ്?
വീരനാം പോരാളിയായൊടുങ്ങീടുവാൻ
അവസരമൊട്ടുമേ തന്നില്ല രാമ നീ
രാമനോടെതിരിട്ട് വീരസ്വർഗം പൂകാൻ
യോഗ്യതയില്ലയോ വാനരൻ ബാലിക്ക്?
എന്തിനായ് രാമാ ചെയ്തൂ കൊടും ചതി ?
കാണാമറയത്ത് കള്ളനായ് നിന്നു നീ ?
കിഷ്കിന്ധാധിപൻ വാനരൻ ബാലിക്ക്
മോക്ഷത്തിലേക്കുള്ള മാർഗമിതാവുമോ ?
ശ്രീരാമബാണമീ നെഞ്ച് നീറ്റുമ്പോഴും
കരയില്ല ദേവേന്ദ്രതനയനാം ബാലി
എങ്കിലോ രാമ നിൻ മിഴികൾ നിറഞ്ഞതാ
കുറ്റബോധത്തിന്റെ കൂരമ്പതേറ്റിട്ടോ?
കുറ്റബോധത്തിന്റെ കൂരമ്പതേറ്റിട്ടോ?
രഞ്ജിത് വെള്ളിമൺ