പ്രണയപ്പക

 ആളിയെരിയുമോരഗ്നിയിലൊടുങ്ങുന്ന
നവയുഗപ്രണയത്തിനന്ത്യരംഗം.
ആ ചിതയിലെ കനൽചിതറി
പലയിടത്താളുന്നു,
പകയുടെ ഭൂതങ്ങൾ
പേപിടിച്ചലയുന്നു.

നാട്യപ്രതിഭകൾ നടനം മടുത്തിട്ട്

കെട്ടിയ കോലങ്ങളിട്ടെറിഞ്ഞലറുന്നു.

നായികാനായകർ വേഷം മറന്നിട്ട്

പ്രതികാരദുർമാർഗ നടനങ്ങളാടുന്നു.

പ്രണയപ്പകയുടെ പ്രതികാര ചിന്തകള-

ണയാതെയെരിയുന്ന കലികാലനേരിതിൽ,

മലരമ്പ് കൊണ്ടൊരാ മനസിലെ മുറിവുകൾ

പൊട്ടിയൊലിക്കുന്ന വ്രണമായി നാറുന്നു.

സ്നേഹിച്ചു പ്രേമിച്ചു കാമിച്ചു തന്നിണയെ

കൊന്നു തിന്നിട്ടുമെട്ടു കാലികൾ പെരുകുന്നു.

തേൻ കിനിയും പനിനീർപൂവിന്നു

ചുറ്റുമൊരു വലനെയ്തു

കാത്തിരിക്കുന്നു ചിലന്തികൾ.

വലയാണ് കെണിയാണിതെ-
ന്നറിയാതെ പെട്ടതല്ലെല്ലായിരകളും,

ഇരയുടെ തേങ്ങലും പകയുടെയാളലും

പലവിധ ഭാവങ്ങളാടി തിമിർത്തിട്ടും,

ആരുപെട്ടാലുമിനിയെന്തു

കേട്ടാലുമവർ ചാടിക്കയറി

കുടുക്കിൽ തലയിടും.

രഞ്ജിത് വെള്ളിമണ്‍