COUNT DOWN (Novel) #8 & 9

അദ്ധ്യായം – 8

 *തൃശൂർ - ബാസ്റ്റിൻ ജോണിൻറെ സങ്കേതം*

 അയാളുടെ മുഴുവൻ സംഘാംഗങ്ങളും എത്തിയിട്ടുണ്ട്.


“ ഞാനിന്ന് രാത്രി തന്നെ തിരുവനന്തപുരത്തേക്ക് പോകും ഷൺമുഖൻ രാവിലെ അവിടെയെത്തും, നമ്മളിത്രകാലവും കളിച്ച കളികളല്ല ഷൺമുഖൻറേത്. അത് വലിയ കളികളാണ്. അതിന് വേണ്ട എല്ലാ സഹായങ്ങളും നമ്മൾ ചെയ്ത് കൊടുക്കണം. ഒന്നു വിളിച്ചാൽ അടുത്ത നിമിഷം എല്ലാവരും എന്തിനും റെഡിയായി വന്നിരിക്കണം. എസ്.പി ഉമാ കല്ല്യാണിയുടെ കാര്യം അയാൾ നേരിട്ട് നോക്കിക്കോളും, പക്ഷേ രാവണൻ, അവനേത് മാളത്തിലാണ് ഉള്ളതെങ്കിലും പുകച്ച് പുറത്ത് ചാടിച്ച് ഷൺമുഖൻറെ മുന്നിലെത്തിക്കുന്നതാണ് നമ്മുടെ ജോലി. അതെനിക്ക് അഭിമാന പ്രശ്നം കൂടിയാണ്. കാരണം, നമ്മുടെ മൂക്കിൻറെ തുമ്പിൽ നിന്നാണ് ശിവലാൽ ഷെട്ടിയെ അവൻ കടത്തിക്കൊണ്ട് പോയത്, അതുകൊണ്ട് നിങ്ങൾ ഇപ്പോത്തന്നെ തുടങ്ങിക്കോ, രാവണനെത്തിരയാൻ. ആ തട്ടുകടക്കാരൻ പറഞ്ഞത് ശരിയാണെങ്കിൽ ആ കാറിന് പിന്നിൽ രാവണൻ എന്നൊരു സ്റ്റിക്കർ പതിച്ചിട്ടുണ്ട്, ബ്ലാക്ക് സ്കോർപ്പിയോ . അതെവിടെ കണ്ടാലും സ്കെച്ചിട്ടോ.”

ബാസ്റ്റിൻറെ നിർദ്ദേശങ്ങൾ എല്ലാവരും മൂളിക്കേട്ടു. ആ  ചെറിയ  മീറ്റിംഗ് അവസാനിച്ചതോടെ അവർ പണി തുടങ്ങുകയും ചെയ്തു.

ബാസ്റ്റിൻ തൻറെ ജീപ്പിൽ തനിച്ച് തിരുവനന്തപുരത്തേക്ക് തിരിച്ചു.  ഒറ്റയ്ക്ക് ചെന്നാൽ മതിയെന്ന് ഷൺമുഖൻ പറഞ്ഞിരുന്നു.

***************************

“ ഈ കാണാതായ ശ്യം സാറിനൊപ്പം ഒരു കേസിൽ ഞാൻ വർക്ക് ചെയ്തിട്ടുണ്ട്, ഞാനിന്നേവരെ ജോലി ചെയ്തിട്ടുള്ള സുപ്പീരിയർ ഓഫീസർമാരിൽ ഏറ്റവും മിടുക്കനായ ആൾ.... ശരിക്കും നമ്മൾ ഈ സിനിമയിലൊക്കെ സുരേഷ് ഗോപിയെക്കണ്ട് കൈയ്യടിക്കില്ലേ... ഭരത് ചന്ദ്രൻ ഐ.പി.എസ് നെപ്പോലെയുള്ള ഓഫീസർ വേഷങ്ങളിൽ നിന്ന് തകർക്കുമ്പോൾ, ശരിക്കും ശ്യാം സാറിൻറെയൊപ്പം ജോലി ചെയ്തപ്പോഴാണ് യഥാർത്ഥ ലോകത്തിലും അത്തരം പോലീസുകാരൊക്കെയുണ്ടെന്ന് മനസിലാക്കിയത്. പക്ഷേ ഉമ മാഡം ശ്യാം സാറിനെപ്പറ്റി പറഞ്ഞപ്പോൾ മുഖത്തും വാക്കുകളിലും വല്ലാത്തൊരു പുച്ഛം നിഴലിച്ചിരുന്ന പോലെ എനിക്ക് തോന്നി”

വന്ദന പറഞ്ഞത് ശരിയാണെന്ന അർത്ഥത്തിൽ ദീപിക തലയാട്ടി. ഓഫീസിൽ നിന്നിറങ്ങി ഒന്നിച്ച് പോകുന്ന വഴിയിൽ ഒരു കോഫീ ഷോപ്പിൽ കയറിയതായിരുന്നു രണ്ടാളും. അവർ ഓരേ പി.എസ്.സി കോച്ചിംഗ് സെൻററിൽ പഠിച്ച പരിചയക്കാരായിരുന്നു. വന്ദന എസ്.ഐ ആയപ്പോൾ ദിപികയ്ക്ക് സി.പി.ഒ ആകാനേ സാധിച്ചിരുന്നുള്ളു. രണ്ടാളും ആ സൗഹൃദം ഇന്നും നല്ല രീതിയിൽ തുടർന്ന് പോകുന്നു.

“തോന്നലൊന്നുമല്ല ഉമ സാറിന് അവരെയൊക്കെ പുച്ഛം തന്നെയാണ്. പിന്നെ വേണമെങ്കിൽ നാടൻ ഭാഷയിൽ കൊതിക്കെറുവെന്നോ, കിട്ടാത്ത മുന്തിരി പുളിക്കുമെന്നോ ഒക്കെ പറയാം”

ദീപിക അത് പറയുമ്പോൾ അവളുടെ മുഖത്ത് പരിഹാസം മാത്രമാണുണ്ടായിരുന്നത്.

 

“അപ്പോ ഞാൻ ഊഹിച്ചത് ശരി തന്നെ ഉമ മാഡവും ശ്യാം സാറുമായി ബന്ധപ്പെട്ട എന്തോ ഒരു ഫ്ലാഷ് ബാക്ക് ഉണ്ട് അല്ലേ”



അതറിയാനുള്ള ആകാംക്ഷയേറിക്കഴിഞ്ഞിരുന്നു വന്ദനയ്ക്ക്.

“അതൊരു സ്ഥിരം ക്ലീഷേ ഫ്ലാഷ് ബാക്കാണ് സാറേ...... വല്ല്യ പുതുമയൊന്നുമില്ലാത്തത്.”

ദീപിക താല്പര്യമില്ലാത്ത മട്ടിൽ ഒഴിഞ്ഞ് പറഞ്ഞത് വന്ദനയ്ക്ക് ഇഷ്ടപ്പെട്ടില്ല.

“ ക്ലീഷേ ആണോ പുതുമയുണ്ടോ എന്ന് കേൾക്കുന്ന ഞാനല്ലേ തീരുമാനിക്കേണ്ടത്. നീ തല്ക്കാലം കഥ പറയ്. മനസിലെന്തെങ്കിലും ഇങ്ങനെ വീണുകഴിഞ്ഞാൽ പിന്നെ അതിലെ നെല്ലും പതിരും വേർതിരിച്ചെടുത്തില്ലെങ്കിൽ എനിക്കങ്ങോട്ട് ഉറക്കം വരില്ല പെണ്ണേ, നീയൊന്ന പറ, വല്ല്യ ഗമ  കാണിക്കാതെ.”

ദീപികയ്ക്ക് ചിരിവന്നു. “ വല്യ എസ്.ഐ ആയിട്ടൊന്നും കാര്യമില്ല, പരദൂഷണത്തിൻറെ മാറ്റർ വരുമ്പോ ....”  തുടർന്ന് പറയാൻ വന്ദന അനുവദിച്ചില്ല. കളിയായി ദീപികയുടെ ചെവിയിൽ പിടിച്ച് നോവിച്ചു.

 

“പിടി വിട് പിടി വിട് ഞാൻ കഥ പറയാം”  ദീപിക ഇല്ലാത്ത വേദന നടിച്ച് കള്ളച്ചിരി ചിരിച്ചു. എന്നിട്ട് വല്ല്യ സിനിമാ കഥ പറയും പോലെ പറഞ്ഞ് തുടങ്ങി

“നമ്മുടെ ഈ ഉമ മാഡം  ആള് പണ്ടേ ഇത്തിരി ജാഡ ടൈപ്പായിരുന്നു. അമ്മാവൻ ദിനകരൻ പാറക്കുന്നേൽ വല്ല്യ രാഷ്ട്രീയ നേതാവ്, 30 വർഷത്തിലധികമായി എം.എൽ.എ , അവർക്ക് ഭരണം എപ്പോ കിട്ടിയാലും പുള്ളിക്കാരനാണല്ലോ ആഭ്യന്തരം, ഇപ്പോഴത്തെപ്പോലെ. കാണാൻ ഗ്ലാമറായത് കൊണ്ട് കോളേജിൽ പഠിക്കുന്ന സമയത്ത് ഒത്തിരി പേർ അവരുടെ പിന്നാലെ നടന്നിട്ടുണ്ട്. അവരൊക്കെ ഉമ സാറിൻറെ അമ്മാവൻ നിയന്ത്രിക്കുന്ന പോലീസിൻറെ തല്ല് ആവോളം കൊണ്ടിട്ടുമുണ്ട്. അരുടെ മുന്നിലും വീഴാതിരുന്ന ഉമകല്ല്യാണി ഒടുവിൽ അടപടലം വീണുപോയി, തിരുവനന്തപുരം നഗരത്തിൽ പുതുതായി ചാർജ്ജെടുത്ത എ.സി.പി ക്ക് മുന്നിൽ. സിനിമാ നടന്മാരെപ്പോലെ ഗ്ലാമറും സ്റ്റൈലും ഒക്കെയുള്ള ആരെയും കൂസാത്ത ഒരു ആക്ഷൻ സുപ്പർസ്റ്റാർ ആയിരുന്നു ആ  എ.സി.പി, പേര് ശ്യാം മാധവ്.

 

അന്ന് ദിനകരൻ പാറക്കുന്നേൽ  ആഭ്യന്തര മന്ത്രിയല്ല, പ്രതിപക്ഷ എം.എൽ.എ ആയിരുന്നു. എന്നാലും മുൻ ആഭ്യന്തര മന്ത്രിയല്ലേ. അയാളുടെ അനന്തരവളും സർവ്വോപരി സുന്ദരിയുമായ ഉമ കല്ല്യാണി ഐ.പി.എസ്, തന്നെക്കാൾ ജൂനിയറായ ശ്യാം മാധവിനോട് തൻറെ പ്രണയം വെട്ടിത്തുറന്ന് പറയുമ്പോൾ അത് തിരസ്കരിക്കപ്പെടുമെന്ന് സ്വപ്നത്തിൽ പോലും കരുതിയരുന്നില്ല.  പക്ഷേ അതാണ് സംഭവിച്ചത്. ശ്യാം സാർ ആ പ്രണയം നിഷ്കരുണം നിരസിച്ചു. ഏതോ ഒരു നഷ്ടപ്രണയത്തിൻറെ നിരാശയിൽ ഈ പ്രണയം വിവാഹം എന്നൊക്കെയുള്ള ഏർപ്പാടിനോട് തന്നെ പുച്ഛമാണെന്നും ഇനിയുള്ള ജീവിതത്തിൽ ഒരു പെണ്ണില്ലാതെ പ്രരാബ്ധമില്ലാതെ കടിഞ്ഞാണില്ലാത്തൊരശ്വമായി പാഞ്ഞ് നടക്കുവാനാണിഷ്ടമെന്ന് പറഞ്ഞ് ഉമ മാഡത്തിൻറെ സ്വപ്നങ്ങളുടെ ചിറകരിഞ്ഞ് കളഞ്ഞു ശ്യാം സർ. പലരീതിയിൽ പലരെയും കൊണ്ട് ഉമ സാർ പറഞ്ഞ് നോക്കി നാണം കെട്ടു. ഒടുവിൽ മാഡത്തിന് സാറിനോട് പകയായി. അത് പലപ്പോഴും പ്രശ്നങ്ങളുണ്ടാക്കി. ചില മഞ്ഞപ്പത്രങ്ങളൊക്കെ വാർത്തകൾ പടച്ചുണ്ടാക്കി, പക്ഷേ ആ വാർത്തകളൊക്കെ ദിനകരൻ സാറിൻറെ സ്വാധീനത്തിനു മുന്നിൽ ആയുസ്സെത്താതെ ഒടുങ്ങി.

 

 

         ഉമ മാഡത്തിൻറെ പക ഒരോ ദിനവും കൂടിക്കൂടി വന്നു. അപ്പോഴാണ് ശ്യാംസാറിന് ഏതോ ഒരു സ്ത്രീയുമായി അടുപ്പമുണ്ടെന്ന് ഉമ മാഡം അറിഞ്ഞത്. അവർ തമ്മിൽ സ്ഥിരമായി മീറ്റ് ചെയ്യാറുണ്ടെന്നും, ഒടുക്കത്തെ പ്രണയമാണെന്നും മാഡം അറിഞ്ഞു. അതിൻറെ പേരിൽ അവർ തമ്മിൽ വാക്കേറ്റമുണ്ടാവുകയും, ഒടുവിൽ കലി കയറിയ ശ്യാം സാർ മാഡത്തിനെ തല്ലുകയും ചെയ്തു. അച്ചടക്കരാഹിത്യത്തിൻറെ പേരിൽ ശ്യാംസാറിനെ സസ്പെൻഡ് ചെയ്തു. ആ സസ്പെൻഷൻ പീരീഡിലാണ് സാറിന് നേരേ ഒരു ഗുണ്ടാ ആക്രമണമുണ്ടായത്. സാറിന് മുതുകിൽ മാരകമായി വെട്ടേറ്റു. ബൈക്കിൽ പോകുന്ന വഴി ആക്രമിക്കുകയായിരുന്നു.  ഉമ മാഡം കൊടുത്ത ക്വൊട്ടേഷനാണെന്നായിരുന്നു പരക്കെയുള്ള സംസാരം, അല്ല അത് അങ്ങനെ തന്നെയാണെന്ന് ഉമ മാഡം ശ്യാം സാറിനോട് പറയുകയും ചെയ്തതാ.

 

 

 എസ്.പി ആയിരുന്ന കിരൺ മാത്യു സാർ അന്ന് ഉമ മാഡത്തിനെതിരേ തയ്യാറാക്കിയ റിപ്പോർട്ട് വലിയ ഒച്ചപ്പാടുണ്ടാക്കുമെന്നു കരുതിയതാ. പക്ഷേ ദിനകരൻ സാറിടപെട്ട് അതൊക്കെ മുക്കി. പിന്നെ അവരോടുള്ള പകയാണോ എന്തോ, ഫോറൻസിക് സർജൻ അൻസിയ റഹ്മാനുമായി ശ്യംസാർ പ്രണയത്തിലായി. അവരുടെ ആദ്യ ഭർത്താവ് ഡിവോഴ്സ് ചെയ്ത് പോയതാണ്. പോരാത്തതിന് ശ്യാംസാറിനേക്കാൾ ഒന്നോ രണ്ടോ വയസ്സ് കൂടുതലും. പ്രായം കൂടുതലാണേലും ആള് ഉമ മാഡത്തിനേപ്പോലെ തന്നെ ഗ്ലാമറാണ്. അവരുടെ അച്ഛനും നല്ല രാഷ്ട്രീയ സ്വാധീനമുള്ളയാളായിരുന്നു. പല വഴിക്ക് ശ്രമിച്ച് നോക്കി അവരെ തമ്മിൽ അകറ്റാൻ, ഉമ മാഡവും അയാൾക്കൊപ്പം ചേർന്നു. ഭീഷണി കൊണ്ട് നടക്കില്ലെന്ന് മനസിലായപ്പോൾ തലങ്ങും വിലങ്ങുമുള്ള സ്ഥലം മാറ്റമായിരുന്നു പിന്നെ, എന്നിട്ടെന്താകാൻ.... ആ പ്രണയം പൂത്തുലഞ്ഞു. വിവാഹം അടുത്തിടെയുണ്ടെന്ന് കേട്ടപ്പോഴാണ് ഈ പുകിലുകളൊക്കെയുണ്ടായത്.”

 

 

ദീപിക പറഞ്ഞ് നിർത്തി. വന്ദന അതിശയത്തോടെ കേട്ടിരിക്കുകയായിരുന്നു.

 

“ആരായിരുന്നു ആ പെൺകുട്ടി, ഉമ മാഡത്തിന് ഇത്രയും കലിപ്പുണ്ടാക്കാൻ കാരണക്കാരി?”

 

വന്ദന തൻറെ സംശയങ്ങളോരോന്നായി ചോദിക്കുവാൻ തുടങ്ങി.

 

“ആ പെൺകുട്ടി ആരാണെന്ന് എനിക്കറിയില്ല. ശ്യാംസാറിനോട് പലരും അതേപ്പറ്റി ചോദിച്ചിട്ടും പറഞ്ഞില്ലെന്നാണ് എൻറെ അറിവ്. ചിലരൊക്കെ കണ്ടിട്ടുണ്ടെന്ന് പറയുന്നു. പക്ഷേ ഡീറ്റെയിൽസ് ഒന്നും ആർക്കും അറിയില്ല. ഏതോ ഒരു അജ്ഞാത സുന്ദരി. എവിടുന്നോ വന്നു.... എങ്ങോട്ടോ പോയ ഒരു പെണ്ണ്....”

 

ദീപികയുടെ ആ മറുപടി വന്ദനയെ നിരാശയാക്കി. അൽപനേരം എന്തോ അലോചിച്ചിരുന്ന വന്ദന അടുത്ത സംശയമെറിഞ്ഞു.

 

“അല്ല ആരായിരുന്നു അന്ന് ശ്യാംസാറിനെ ആക്രമിച്ച ഗുണ്ട?”

 

“അത് പേര് കേട്ട ഒരു ഗുണ്ടയായിരുന്നു. സാജൻ.... തീവെട്ടി സാജൻ..... കുപ്രസിദ്ധനായിരുന്ന അറവുകാരൻ ആംബ്രോസെന്ന ഗുണ്ടയെ ഒരു ഉത്സവപ്പറമ്പിൽ ഇട്ട് തല്ലി ഇഞ്ചപ്പരുവമാക്കി വരവറിയിച്ചവൻ, എഴുന്നള്ളത്തിന് ആനക്കുമുന്നിൽ പിടിച്ചിരുന്ന തീവെട്ടി കൊണ്ടായിരുന്നത്രേ ആംബ്രോസിനെയും സംഘത്തെയും അയാൾ ഒറ്റയ്ക്ക് നേരിട്ടത്. അങ്ങനെ തീവെട്ടി സാജൻ എന്ന ഗുണ്ടാ പിറന്നു. നിരവധി കേസുകളിൽ പ്രതിയായിരുന്നു.  പോലീസിന് പോലും ഭയമായിരുന്നു അയാളെ. ആ തീവെട്ടി സാജനായിരുന്നു ശ്യാം സാറിനെ ആക്രമിച്ചത്.”

 

“ എന്നിട്ട് അയാളെ അറസ്റ്റ് ചെയ്തിരുന്നോ” വന്ദനയുടെ സംശയങ്ങൾക്ക് അവസാനമില്ലായിരുന്നു.

 

“എവിടുന്ന് അറസ്റ്റ് ചെയ്യാൻ. അയാളൊളിവിൽ പോയി, പോലീസ് തീവെട്ടി സാജനെ പിടികിട്ടാപ്പുള്ളിയായി പ്രഖ്യാപിച്ചു. ഇന്നു വരെ അയാളെ കിട്ടിയിട്ടില്ല. സുകുമാരക്കുറുപ്പിനെ പോലെ എവിടെയോ പോയ് മറഞ്ഞു.”

 

 

“മറഞ്ഞതാണോ അതോ…? ശ്യാംസാറിനറിയാം” അർത്ഥഗർഭമായ ഒരു പുഞ്ചിരിയുണ്ടായരുന്നു വന്ദനയുടെ മുഖത്ത്.

 

“അതെന്താ നിൻറെ മുഖത്തൊരു നിഗൂഢമായ ചിരി” ദീപിക ആ ചിരിക്ക് പിന്നിലെ കാരണം തേടി.

 

“ശ്യാം സാറിൻറെ കൂടെ കുറച്ച് നാള് ഞാൻ ജോലി ചെയ്തതാ തൃശ്ശൂരിൽ. ഞാൻ മനസിലാക്കിയ ശ്യാം മാധവ് ഐ.പി.എസ് കിട്ടാക്കടങ്ങളൊന്നും സൂക്ഷിക്കുന്നയാളല്ല.

അല്ല അതൊക്കെ പോട്ടെ...... നിനക്കിതൊക്കെ ഇത്ര കൃത്യമായെങ്ങനെ അറിയാം?

 

“ഞാൻ കുറച്ചധികം കാലം ഉമ മാഡത്തിനൊപ്പം ജോലി നോക്കിയിട്ടുണ്ട്. മാഡത്തിനെന്തു കൊണ്ടോ എന്നെ വല്ല്യ ഇഷ്ടമായിരുന്നു അന്നും ഇന്നും. അതല്ലേ ഇപ്പോൾ ഈ ടീമിൽ എന്നെയും ഉൾപ്പെടുത്തിയത്. പിന്നെ അന്ന് ആശുപത്രിയിൽ കിടന്ന ശ്യാം സാറിനെ കാണാൻ പോയപ്പോഴും ഞാൻ ഒപ്പമുണ്ടായിരുന്നു. എൻറെ കാതിൽ ഞാൻ കേട്ടതാ ആ ക്വട്ടേഷൻ ഉമ മാഡം കൊടുത്തതാണെന്ന് അവർ ശ്യാം സാറിനോട് പറയുന്നത്.”

 

ദീപികയുടെ ശ്വാസഗതി അൽപം ഉയർന്നിരുന്നു, ആ സംഭവം തൊട്ടുമുൻപിൽ അപ്പോ കാണുന്നത് പോലെ.

 

******************

 

“ബാസ്റ്റിൻ ജോൺ ഒറ്റയ്ക്കൊരു കാറിൽ തിരുവനന്തപുരത്തേക്ക് തിരിച്ചിട്ടുണ്ട്. ലക്ഷ്യം ഷൺമുഖന് വേണ്ട സഹായങ്ങൾ ചെയ്തുകൊടുക്കുക എന്നതാണ്. ഞാനിപ്പോ അയാളെ ഫോളോ ചെയ്യുകയാണ്, പോലീസ് വണ്ടിയല്ല, എൻറെ ഒരു സുഹൃത്തിൻറെ കാറിലാണ്. അയാളിലൂടെ നമുക്ക് വേഗം ഷൺമുഖനിലെത്താൻ കഴിയും. അയാളെ അകത്താക്കാനും”

ഡി.വൈ.എസ്.പി ഹരീഷിൻറെ ഫോൺകോളിനോട് ഉമ പക്ഷേ വളരെ തണുപ്പൻ മട്ടിലാണ് പ്രതികരിച്ചത്.

 

“ഹരീഷേ ഈ പറയുന്ന ഷൺമുഖൻറെ പേരിൽ കേരളത്തിലെവിടെയും ഒരു പെറ്റിക്കേസ് പോലുമില്ല. പിന്നെ എന്തിൻറെ പേരിൽ അയാളെ നമ്മൾ അകത്താക്കും?, എന്നെ ഭീഷണിപ്പെടുത്തിയെന്ന് പറഞ്ഞോ ? അതിന് ആ ഫോൺകോൾ ചെയ്തത് ഷൺമുഖനാണെന്ന് പോലും നമുക്ക് തെളിയിക്കാനാവില്ല, ഏതോ ഒരു കന്നഡക്കാരൻ ചെല്ലയ്യ യുടെ പേരിലുള്ള സിംകാർഡാണത്. “

 

“മാഡം... അതൊക്കെ ശരിയായിരിക്കാം. പക്ഷേ അയാൾ വരുന്നത് മാഡത്തിനെ ലക്ഷ്യമിട്ടാണെന്നത് നമുക്കറിയാവുന്ന സത്യമല്ലേ.?”

 

“അത് സത്യമാണെങ്കിൽ അയാൾ അതിന് വരട്ടെ നമുക്ക് അപ്പോൾ നോക്കാം.... അല്ലാതെ അതിൻറെ പിന്നാലെ നടന്ന് ഉറക്കം കളയണോ ? അതിലും വലിയ തലവേദന കേസ് നമ്മുടെ ചുമലിലുണ്ടല്ലോ.... ഇപ്പോ അതേപ്പറ്റി ചിന്തിക്കൂ”

 

പക്ഷേ ഉമയുടെ ആ ഉദാസീന ഭാവത്തോട് ഹരീഷിന് യോജിക്കാനായില്ല. അയാളുടെ വണ്ടി അപ്പോഴും ബാസ്റ്റിൻറെ വണ്ടിയെ കൃത്യമായ അകലത്തിൽ ഫോളോ ചെയ്തുകൊണ്ടിരിക്കുകയായിരുന്നു.

 

“മാഡം എൻറെ സുപ്പീരിയറാണ്. പക്ഷേ ഞാൻ സംസാരിക്കുന്നത് എൻറെ നിരവധി വർഷത്തെ സർവ്വീസ് അനുഭവങ്ങളുടെ വെളിച്ചത്തിലാണ്. മാഡം കേട്ടിട്ടില്ലേ ; ഓടുന്ന പട്ടിക്ക് ഒരു മുഴം മുൻപേ.... ഇവിടെ ഇതാവശ്യമാണ് മാഡം കാരണം പലയിടത്തായി ചിതറിക്കിടക്കുന്ന കുറേയധികം കണ്ണികൾ കൂട്ടിച്ചേർത്താലേ ആ കേസ് നമുക്ക് തെളിയിക്കാൻ പറ്റു. അപ്പോ പിന്നെ ഷൺമുഖനെ പോലെയൊരു ഭീഷണി സ്വതന്ത്രമായി പുറത്ത് നിൽക്കുന്നത് നമുക്ക് ബുദ്ധിമുട്ടുണ്ടാക്കും. പിന്നെ മാഡം പറഞ്ഞു കേസില്ലെന്ന്. നമ്മൾ വിചാരിച്ചാൽ ഷൺമുഖൻറെ പേരിലൊരു കേസുണ്ടാക്കാനാണോ പാട്. മാഡം യൂ ഡോണ്ട് ബോതർ. ഐ വിൽ ഹാൻഡിൽ ദിസ്.”

 

 

ഹരീഷ് എന്തൊക്കെയോ നിശ്ചയിച്ചുറപ്പിച്ച മട്ടായിരുന്നു. അതുകൊണ്ട് തന്നെ ഉമ പിന്നെ കൂടുതലൊന്നും പറയാൻ മിനക്കെട്ടില്ല. ആ ഫോൺ സംഭാഷണം വേഗത്തിലവസാനിച്ചു.

 

അപ്പോൾ ബാസ്റ്റിൻ ജോണിൻറെ കാറും പിന്നാലെ ഡി.വൈ.എസ് .പി ഹരീഷിൻറെ വണ്ടിയും എറണാകുളം നഗരത്തിൽ പ്രവേശിച്ചിരുന്നു.

 

************************

 

അഷ്ടമുടിക്കായലിലെ ദ്വീപ്

 

കായൽത്തീരത്തെ മരത്തണലിൽ പച്ചപ്പുല്ലിന് മുകളിൽ കിടക്കുകയാണ് ശ്യാം മാധവ്. അയാളെന്തോ കാര്യമായ ചിന്തയിലാണ്, കുറച്ചധികം നേരമായി ശ്യാമങ്ങനെ കിടക്കുന്നത് കണ്ട മണികർണ്ണിക അയാൾക്കരികിലേക്ക് നടന്ന് ചെന്നു, അനുവാദം ചോദിക്കാതെ അരികിലിരുന്നു. അവളെ  കണ്ട് ശ്യാം എണീറ്റിരുന്നു.

 

“ എന്താണ് ശ്യാം ? എന്തോ കാര്യമായ ചിന്തയിലായിരുന്നല്ലോ.... വേദനിപ്പിക്കുന്ന ഫ്ലാഷ് ബാക്ക് അതോ ആശങ്കപ്പെടുത്തുന്ന ഭാവിയോ? എന്താണ് ഈ മുഖത്തെ ചിന്താഭാരത്തിന് കാരണം?”

 

“ഒന്നുമില്ല മണികർണ്ണിക വെറുതേയിരുന്നപ്പോൾ മനസ് അനുസരണക്കേട് കാട്ടി. മറവിയിലേക്ക് ഞാൻ ബോധപൂർവ്വം വലിച്ചെറിഞ്ഞ ചിലതൊക്കെ വീണ്ടും വലിച്ചെടുക്കുന്നു. ഓർമ്മകൾ ..... ഓർക്കാനിഷ്ടമില്ലാത്ത ഓർമ്മകൾ...”

 

 പടിഞ്ഞാറ് റെയിൽവേ പാലത്തിനപ്പുറത്തേക്ക് താണിറങ്ങി മറയുന്ന കുങ്കുമ സൂര്യനെ നോക്കിയിരുന്നാണ് ശ്യാം അത് പറഞ്ഞത്.

 

“മുതുകിലെ മുറിപ്പാടിൻറെ വേദനയിന്നും പിൻതുടരുന്നുണ്ടോ? ഉണ്ടെങ്കിൽ അതിൻറെ കാരണക്കാരിയായ ഞാനും പിൻതിരിഞ്ഞ് നടക്കേണ്ടതല്ലേ?   ആ ഭൂതകാലത്തിലേക്ക്..... ഇനി ഒരിക്കലും ആ ഭൂതകാലത്തിലേക്ക് ഓർമ്മകളെപ്പോലും മേയാൻ വിടരുതെന്ന് പറഞ്ഞത് ശ്യാമാണ്. ഞാനാ വാക്ക് പാലിക്കുന്നു ഇന്നും. പക്ഷേ ശ്യാമോ?”

 

മണികർണ്ണിക തൻറെ കണ്ണുകൾ തുടച്ചു.

 

“മണികർണ്ണിക..... ഒരു വലിയ സാമ്രാജ്യത്തിനെതീരേ പടനയിച്ച കരുത്തയായ ഝാൻസിയിലെ റാണിയുടെ പേര്. ആ പേര് എനിക്ക് ചാർത്തി തന്നത് നിങ്ങളാണ്. എൻറെ പഴയ പേരിനൊപ്പം നിങ്ങൾ പറഞ്ഞത് പോലെ ആ ഭൂതകാലവും ഞാൻ മായ്ച്ചു കളഞ്ഞു. എന്തിനും ഏതിനും തയ്യാറായി ഇങ്ങനെ കൂടെ നിൽക്കുമ്പോൾ നിങ്ങളൊക്കെയിങ്ങനെ ഓർമ്മകളുടെ ബന്ധനത്തിൽ കിടക്കുന്നു. അങ്ങനെ വന്നാൽ ഞാനും....”

 

അവളുടെ തൊണ്ടയിടറി ... വാക്കുകൾ മുറിഞ്ഞു....അവളപ്പോൾ കരയുകയായിരുന്നു. അത് മനസിലാക്കിയ ശ്യാം തിരിഞ്ഞിരുന്നു. അവളുടെ കവിളിലേക്കൊലിച്ചിറങ്ങിയ കണ്ണീർ തുടച്ചു. അത് കണ്ട് കൊണ്ട് സതീഷ് ബോസ് വന്നു.

 

“എന്താടോ രണ്ടാളും കൂടെ കായൽക്കരയിലൊരു ശൃംഗാരം.... ഇതൊക്കെ കണ്ടിട്ട് പണ്ട് ഉമാകല്ല്യാണി കൊടുത്തപോലെ ഞാനും ക്വട്ടേഷൻ വല്ലതും കൊടുക്കേണ്ടി വരുമോ?

 

ചെറിയൊരു ചിരിയോടെയാണ് സതീഷ് അത് ചോദിച്ചത്. അയാൾ ആവർക്ക് നേരേ കൈ നീട്ടി. മണികർണ്ണിക കയ്യിൽ പിടിച്ചെണീച്ചു. ശേഷം അവർ രണ്ടാളും ചേർന്ന് കൈകൾ നീട്ടിയപ്പോൾ ശ്യാം അവരെ രണ്ട് പേരെയും പിടിച്ചെണീറ്റു. അപ്പോൾ ശ്യാമിൻറെ മുഖത്തും ചിരിയുണ്ടായിരുന്നു.

 

“ക്വട്ടേഷനൊക്കെ കൊടുത്തോളൂ..... പക്ഷേ ആ തീവെട്ടി സജീവിന് തന്നെ കൊടുക്കണം, പിന്നിലൂടെ വന്ന് പണിയാൻ പറയുകയും വേണം” അത് പറഞ്ഞ് ശ്യാം പൊട്ടിച്ചിരിച്ചു.

 

“അതിന് ആ തീവെട്ടി പിടികിട്ടാപ്പുള്ളിയല്ലേ.....” അത് പറയുമ്പോൾ സതീഷിൻറെ മുഖത്തും നിഗൂഢമായൊരു ചിരിയുണ്ടായിരുന്നു.

 

“അത് ശരിയാ തീവെട്ടി സജീവ് പിടികിട്ടാപ്പുള്ളിയാണ്. ഇനി ആർക്കും പിടികിട്ടാത്ത പുള്ളി. അല്ലേ ശ്യാം സാറേ.....” മണികർണ്ണികയുടെ ആ വാക്കുകൾക്ക് ഒരു ചെറു പുഞ്ചിരി മാത്രമായിരുന്നു ശ്യാമിൻറെ മറുപടി.

അവിടേക്ക് ജെറാൾഡ് സേവ്യർ ധൃതിയിൽ വരുന്നുണ്ടായിരുന്നു.

 

“ഇൻഫർമേഷൻ പക്കാ ആണ്. ബാസ്റ്റിൻ ജോൺ തിരുവനന്തപുരത്തേക്ക് ഒറ്റക്ക് ഡ്രൈവ് ചെയ്തു പോകുന്നു. ഷൺമുഖൻ രാമേശ്വരത്ത് നിന്നും തിരുവനന്തപുരത്തേക്ക് വരുന്നു. ഒപ്പം പത്ത് പേർ. ഷൺമുഖൻറെ ലക്ഷ്യം ഉമാ കല്ല്യാണി ഐ.പി.എസ് മാത്രമല്ല, അവൻറെ ലിസ്റ്റിലെ പ്രധാന ശത്രു രാവണൻ തന്നെയാണ്. അവൻറെ ഏറ്റവും വലിയ കരുത്തായിരുന്ന ദിനചന്ദ്രയുടെ നഷ്ടം, പിന്നെ അജ്മൽ ജലാൽ. അൻസിയയുടെ തിരോധാനത്തിനു പിന്നിലും രാവണനാണെന്ന് അവന് ഈസിയായി മനസിലാകും... പൊറുക്കില്ല ഷൺമുഖൻ.”

 

ജെറാൾഡ് അത് പറയുമ്പോഴും അയാൾക്ക് തെല്ലും ഭയമില്ലായിരുന്നു.

 

“ഷൺമുഖൻ കൂടിയിവിടെ കളത്തിലിറങ്ങട്ടെ ജെറീ , എന്നാലെ നമ്മളുടെ കളികൾക്കൊരു ഉഷാറുണ്ടാവൂ.... അതിനു വേണ്ടിയല്ലേ നമ്മളിങ്ങനെ കാത്തിരുന്നത്.  ഒരു വശത്ത് ഉമാ കല്ല്യാണി ഐ.പി.എസ്, മറു വശത്ത് ഷൺമുഖൻ ഒപ്പം അവരുടെ സൈന്യങ്ങളും. ചതുരംഗക്കളത്തിൽ അവർ നിരന്നങ്ങട് നിൽക്കട്ടെ .... പക്ഷേ അവരോരോരുത്തരും എങ്ങോട്ടൊക്കെ നീങ്ങണമെന്നും എപ്പോ നീങ്ങണമെന്നും ആരെ വെട്ടണമെന്നുമൊക്കെ രാവണൻ തീരുമാനിക്കും.... പത്ത് തലയുടെ ബുദ്ധിയും ഇരുപത് കൈകളുടെ ശക്തിയുമുള്ള രാവണൻ....”

 

ശരിക്കും അത് പറയുമ്പോൾ ശ്യാമിൻറെ കണ്ണുകളിലും ശബ്ദത്തിലും ഒരു ആസുരഭാവം നിറഞ്ഞിരുന്നു.

 

“ബാസ്റ്റിൻറെ കൈയ്യിൽ ഷൺമുഖന് കൊടുക്കാനൊരു സർപ്രൈസ് സമ്മാനമുണ്ട്. മറ്റാരെയും കാണിക്കാതെ അയാൾ ഭദ്രമായി ഒപ്പം കൊണ്ട് പോകുന്നൊരു സമ്മാനം, ഷൺമുഖന് ഏറ്റവവുമധികം സന്തോഷം നൽകുന്ന സമ്മാനം.”

 

ജെറാൾഡ് എന്തിനേക്കുറിച്ചാണ് പറയുന്നതെന്ന് അവർക്കാർക്കും മനസിലായില്ല. അവർ ബാക്കി കൂടി കേൾക്കാൻ ജെറാൾഡിൻറെ മുഖത്തേക്ക് തന്നെ നോക്കി, അയാൾ തുടർന്നു.

 

“ ഒരു സിസിറ്റിവി ഫൂട്ടേജടങ്ങിയ ഹാർഡ് ഡിസ്ക് ആണ് ആ സമ്മാനം. അതിൽ ശിവലാലിൻറെ എൻഡവറും അതിന് പിന്നാലെ പോകുന്ന രാവണൻറെ സ്കോർപ്പിയോയും ഉണ്ട്, മാത്രമല്ല, മുൻസീറ്റിലിരിക്കുന്ന മണികർണ്ണികയുടെ രൂപവും. അത് ഷൺമുഖൻ കണ്ടാൽ? നമ്മുടെ എല്ലാ പ്ലാനുകളും തകരും”

 

“അങ്ങനെയൊരു വീഴ്ച നമുക്കെങ്ങനെ പറ്റി? ഇത്രയധികം പ്ലാൻ ചെയ്ത ഓപ്പറേഷനായിട്ടും.?” സതീഷ് അതേക്കുറിച്ചായിരുന്നു ചിന്തിച്ചത്, അയാളുടെ മനസപ്പോൾ ആ റൂട്ടിലൂടെ ഒരിക്കൽ കൂടി സഞ്ചരിക്കുകയായിരുന്നു. അത്തരമൊരു സിസിറ്റിവിയിലെങ്ങനെ പെട്ടുവെന്നറിയാൻ. അത് മനസിലാക്കിയ ശ്യാം സതീഷിൻറെ തോളത്ത് തട്ടി.

 

“എത്ര സമർത്ഥമായി പ്ലാൻ ചെയ്ത ക്രൈമിലും ദൈവം കരുതി വയ്ക്കുന്ന ഒരു ലൂപ്ഹോളുണ്ടാകുമെന്ന് അങ്ങനെ കരുതിയാൽ മതി. പിന്നെ ഷൺമുഖൻ അത് കണ്ടാലല്ലേ പ്രശ്നം. അത് ഷൺമുഖൻ കാണണമെങ്കിൽ ബാസ്റ്റിൻ തിരുവനന്തപുരത്ത് എത്തണ്ടേ?”

 

അത് പറയുമ്പോൾ ശ്യാമിൻറെ മുഖത്തൊരു വേട്ടക്കാരൻറെ ക്രൗര്യമുണ്ടായിരുന്നു.

 

******************

 

        കായംകുളം പിന്നിട്ട് കുതിക്കുകയായിരുന്നു ബാസ്റ്റിൻറെ വണ്ടി, അപ്പോഴും സുരക്ഷിതമായ അകലത്തിൽ ഹരീഷിൻറെ കാർ ഉണ്ടായിരുന്നു. എന്നാൽ ബാസ്റ്റിനെ സമർത്ഥമായി കബളിപ്പിക്കാമെന്ന ഡി.വൈ.എസ്.പി ഹരീഷിൻറെ വിശ്വാസം തെറ്റായിരുന്നു. തൻറെ പിന്നിലെ അപകടം തിരിച്ചറിഞ്ഞിരുന്ന ബാസ്റ്റിൻ ഹരീഷിനായി കെണിയൊരുക്കിക്കഴിഞ്ഞിരുന്നു. ഓച്ചിറ പിന്നിട്ട് കഴിഞ്ഞപ്പോൾ അവിടെ കാത്ത് കിടന്നിരുന്ന ഒരു ഇന്നോവ ഹരീഷിൻറെ കാറിന് പിന്നാലെ കൂടി. ഇരയെ സമർത്ഥമായി കെണിയിലേക്ക് നയിക്കുന്ന വേട്ടക്കാരൻറെ കൗശലം നിറഞ്ഞപുഞ്ചിരിയൊടെ മുന്നിലെ വണ്ടിയിൽ ബാസ്റ്റിൻ ജോണും അയാൾ വിധിച്ച ശിക്ഷ നടപ്പിലാക്കാനുള്ളവർ ഏറ്റുവും പിന്നിലുമായി യാത്ര തുടർന്നു. പുതിയ കൊല്ലം ബൈപ്പാസിലെ ഇരുളിലേക്ക് കയറിക്കഴിഞ്ഞാൽ ഹരീഷിൻറെ വിധി നടപ്പിലാക്കാനായിരുന്നു ബാസ്റ്റിൻറെ നിർദ്ദേശം.

 

*****************

 

            കൊല്ലം ബൈപ്പാസിൽ കടവൂർ പാലത്തിന് താഴെ ഒരു സ്പീഡ്ബോട്ട് വന്നു നിന്നു. അതിൽ നിന്നും രണ്ട് ചെറുപ്പക്കാർ കരയിലേക്കിറങ്ങി. അവർ മുകളിലെ റോഡിലേക്ക് നടന്നു കയറി.  ബാസ്റ്റിൻ ജോണിൻറെ വരവും കാത്ത് ബൈപ്പാസിലെ ഇരുളിൽ അവർ നിന്നു, ഒരിക്കലും ഉന്നം പിഴച്ചിട്ടില്ലാത്ത കൈകളിൽ നിറതോക്കുമായി.

 
 

അദ്ധ്യായം – 9

 

ബൈപ്പാസിലെ ആദ്യപാലം കടന്നതും ഡി.വൈ.എസ്.പി ഹരീഷിൻറെ കാറിനെ ഓവർടേക്ക് ചെയ്ത ഇന്നോവ ഹരീഷിൻറെ വണ്ടിക്ക് കുറുകേ കയറ്റി നിർത്തി. മുന്നിൽ പോയ ബാസ്റ്റിൻ ഒന്ന് ബ്രേക്ക് ചെയ്ത് പിന്നലേക്ക് നോക്കിയ ശേഷം വണ്ടി ഓടിച്ചു പോയി. ഇന്നോവയിൽ നിന്നും അഞ്ച് ചെറുപ്പക്കാർ ചാടിയിറങ്ങി. അപകടം മനസിലാക്കിയ ഹരീഷിന് എന്തെങ്കിലും ചെയ്യുവാൻ കഴിയും മുൻപ് അവർ അയാളുടെ വണ്ടിയെ വളഞ്ഞ് കഴിഞ്ഞിരുന്നു.

 

ഹരീഷ് തൻറെ സർവ്വീസ് റിവോൾവർ കയ്യിലെടുത്തു, പക്ഷേ അടുത്തനിമിഷം തൻറെ കാറിൻറെ മുന്നിലെയും വശത്തേയും ഗ്ലാസുകൾ തകർന്ന് വീഴുന്നതാണ് കണ്ടത്. അവരിൽ രണ്ട് പേർ കയ്യിലുണ്ടായിരുന്ന ഇരുമ്പ് ദണ്ഡ് കൊണ്ട് ചില്ലുകൾ അടിച്ചു തകർക്കുകയായിരുന്നു. ഡോർ വലിച്ചു തുറന്ന് ഹരീഷിനെ അവർ പുറത്തേക്കിട്ടു. കയ്യിലിരുന്ന തോക്ക് പോലും ഫലപ്രദമായി ഉപയോഗിക്കാൻ ഹരീഷിന് കഴിഞ്ഞില്ല. അത് നിമിഷനേരത്തിനുള്ളിൽ അവരുടെ കയ്യിലായി. അവരുടെ മെയ്ക്കരുത്തിന് മുന്നിൽ തനിക്കൊന്നും ചെയ്യാനില്ലെന്നറിയാമായിരുന്നിട്ടും വെറുതേയങ്ങ് തോറ്റ് കൊടുക്കുവാൻ അയാൾ തയ്യാറായില്ല. അവരിൽ നിന്നും കുതറി മാറിയ അയാൾ സർവ്വ ശക്തിയും സംഭരിച്ച് മുന്നിൽ നിന്നവൻറെ മുഖത്തേക്ക് മുഷ്ടി ചുരുട്ടിയിടിച്ചു. അവൻറെ വായിൽ നിന്നും ചോരയോടൊപ്പം രണ്ട് പല്ലുകളും പുറത്തേക്ക് തെറിച്ചു. പിന്നിലൂടെ പിടിക്കാൻ വന്നവന് ഹരീഷിനെക്കാൾ പൊക്കം കൂടുതലായിരുന്നതിനാൽ കൈമുട്ട് കൊണ്ട് പിന്നിലേക്കുള്ള ഹരീഷിൻറെ പ്രഹരം അവൻറെ വയറിലേക്ക് മിസൈൽ പോലെ തറച്ചു. അവൻ മുന്നിലേക്ക് വേച്ചിരുന്നുപോയി, ക്ഷണനേരം കൊണ്ട് വെട്ടിത്തിരിഞ്ഞ് വായുവിലുയർന്ന് ഹരീഷ് കാലുകൊണ്ട് അയാളുടെ കഴുത്തിൽ തൊഴിച്ചു. വെട്ടിയിട്ട വാഴത്തട കണക്കേ അവൻ നിലത്ത് വീണു. പക്ഷേ അപ്പോഴേക്കും ഒരുത്തൻ പിന്നിലൂടെ വന്ന് ഹരീഷിൻറെ കഴുത്തിൽ പിടുത്തമിട്ടിരുന്നു. ഹരീഷ് തൻറെ തല കൊണ്ട് പിന്നിലേക്ക് ശക്തിയായി ഇടിച്ചപ്പോൾ കഴുത്തിലെ പിടിവിട്ട് അവൻ പിന്നോക്കം മാറി. അവൻറെ  മൂക്കിൻറെ പാലം തകർന്ന് ചോരയൊഴുകുകയായിരുന്നു. അവന് മറ്റെന്തെങ്കിലും ചിന്തിക്കാൻ കഴിയും മുൻപേ രണ്ട് കാതുകളിലും ഒരേ സമയം ഹരീഷിൻറെ രണ്ട് കൈപ്പത്തികളും പതിഞ്ഞിരുന്നു. അതേ സമയം തൻറെ തലയ്ക്ക് പിന്നിൽ ശക്തമായ പ്രഹരമേറ്റ് തലയോട് പൊട്ടിയത് ഹരീഷറിഞ്ഞു. പിൻകഴുത്തിലേക്ക് ചോരയുടെ നനവ് പടർന്നതോടൊപ്പം കണ്ണുകൾക്ക് മങ്ങലും തോന്നി. പിന്തിരിഞ്ഞ് നോക്കിയ ഹരീഷിൻറെ കീഴ്ത്താടിയെല്ല് തകർത്ത് കൊണ്ട് ഒരിക്കൽ കൂടി ഇരുമ്പ് ദണ്ഡ് പാഞ്ഞുപോയി. കണ്ണുകളിൽ ഇരുൾ നിറയുമ്പോൾ കാർക്കിച്ച് തുപ്പിക്കൊണ്ട് അവൻ പറയുന്നത് അവ്യക്തമായി ഹരീഷിൻറെ ചെവിയിൽ മുഴങ്ങി.

 

“ വലിച്ചെടുത്ത് ആ കായലിൽ തള്ളെടാ ഇവനെ”

 

അപ്പോഴും ഹരീഷിൻറെ കനത്ത  പ്രഹരമേറ്റ രണ്ട് പേർ തറയിൽ വീണു കിടക്കുകയായിരുന്നു. മറ്റ് രണ്ട് പേർ വന്ന് ഹരീഷിനെ താങ്ങിയെടുത്തു. പക്ഷേ അവരുടെ കണ്ണിലേക്ക് ദൂരെ നിന്നും വരുന്ന ഏതോ വാഹനത്തിൻറെ വെളിച്ചം തറഞ്ഞ് കയറി. അവർ ഹരീഷിനെ സൈഡിലെ പൊന്തക്കാട്ടിലേക്കിട്ടശേഷം ആ വാഹനം കടന്ന് പോകാനായി കാത്ത് നിന്നു. അതൊരു പഴകിപ്പോളിഞ്ഞ അമ്പാസിഡർ കാർ ആയിരുന്നു. അവരെ കടന്ന് പോയ ആ കാർ അവരുടെ ഇന്നോവയുടെ പിന്നിലിടിച്ച് നിന്നു.  അത് കണ്ട് കലി കയറിയ ഗുണ്ടകളിൽ രണ്ട് പേർ തെറി വിളിച്ചുകൊണ്ട് അമ്പാസിഡറിനരികിലേക്ക് കുതിച്ചെത്തി. അതിൻറെ മുന്നിലെ സീറ്റിൽ ഡ്രൈവറെ കൂടാതെ ഒരാൾ കൂടിയുണ്ടായിരുന്നു. താഴ്ത്തി വച്ചിരുന്ന ഗ്ലാസിനുള്ളിലൂടെ ഇരുവശത്ത് നിന്നുമെത്തിയ ഗുണ്ടകൾ ഒരേ സമയം ഡ്രൈവറുടെയും സഹയാത്രികൻറെയും ഷർട്ടിനു കുത്തിപ്പിടിച്ചു. അടുത്ത നിമിഷത്തിൽ തങ്ങളുടെ കയ്യിലേക്ക് രണ്ട് സൂചികൾ തറഞ്ഞ് കയറിയതായും വല്ലാത്തൊരു നനവ് പടർന്നതായും തോന്നി. ശരീരത്തിലേക്ക് പടർന്ന് പുകയുന്ന വേദനയിൽ പെട്ടെന്ന് കൈ പിന്നിലേക്ക് വലിച്ച അവർക്ക് കൈകളിൽ എന്തോ ഭാരവും തോന്നിയിരുന്നു. ബാലൻസ് തെറ്റി റോഡലേക്ക് വീണുപോയ അവർ നേർത്ത നിലാവെളിച്ചത്തിൽ തങ്ങളുടെ കൈയ്യിൽ കടിച്ച് പിടിച്ചിരിക്കുന്നത് പാമ്പാണെന്ന് തിരിച്ചറിഞ്ഞ നിമിഷം ഭയന്ന് നിലവിളിച്ചു.  ഓടിയെത്തിയ അവരുടെ കൂടെയുള്ളവർ എന്ത് വേണമെന്നറിയാതെ നിന്നപ്പോൾ അമ്പാസിഡറിൻറെ ഡോർ തുറന്ന് രണ്ട് പേർ പുറത്തിറങ്ങി. അവർ രണ്ട് പേരും വടി കൂത്തിപ്പിടിച്ചാണ് ഇറങ്ങി അൽപം നീങ്ങി നിന്നത്. തലയിൽ വച്ചിരുന്ന കൗബോയ് തൊപ്പിയുടെ നിഴൽ വിഴുന്നതിനാൽ തന്നെ അവരുടെ മുഖം ആ ഇരുളിൽ കൂടുതൽ ഇരുണ്ടിരുന്നു. തറയിൽ കിടന്ന് പിടയുന്ന ഗുണ്ടകളുടെ കൈത്തണ്ടയിൽ നിന്നും പാമ്പുകൾ അപ്പോഴും പിടിവിട്ടിട്ടില്ലായിരുന്നു. അത് കണ്ട് പുച്ഛത്തിൽ ചിരിച്ച അമ്പാസിഡറിൻറെ ഡ്രൈവറാണ് സംസാരിച്ചത്.

 

“അങ്ങനെ അനായാസം അതിനെ പറിച്ചെറിയാനാകില്ല. നല്ല മുഴുത്ത അണലികളാണ്. ചൂണ്ടക്കൊളുത്തുപോലെ വളഞ്ഞ് കൂർത്ത അവയുടെ വിഷപ്പല്ലുകൾ അത്രയെളുപ്പം ഊരിയെടുക്കാനുമാകില്ല. പട്ടി കടിച്ച് പറിക്കുന്ന പോലെ നിൻറെയൊക്കെ മാംസം സഹിതമേ അവ പോകു.”

 

 പക്ഷേ അപ്പോഴേക്കും പാമ്പിനെ അവർ ദൂരേക്കെറിഞ്ഞ് കളഞ്ഞിരുന്നു. രണ്ട് പേരുടെ കൈയ്യിൽ നിന്നും ചോരയൊഴുകുന്നുണ്ടായിരുന്നു. അവർ എണീറ്റു അത് കണ്ട് അമ്പാസിഡറിൽ വന്നവരിരുവരും തലയിലെ തൊപ്പിയെടുത്ത് കാറിൻറെ ബോണറ്റിൽ വച്ചു. ഒരാൾ പോക്കറ്റിൽ നിന്നും സിഗററ്റെടുത്ത് ഒരെണ്ണം ചുണ്ടോട് ചേർത്തു, ഒരെണ്ണം രണ്ടാമന് കൊടുത്തു. എന്നിട്ട് ലൈറ്റർ തെളിത്ത് തീപകർന്നു. അപ്പോഴാണ് തറയിൽ വീണുകിടന്നവർ അവരുടെ മുഖം കണ്ടത്. എസ്.പി സതീഷ് ബോസും എസ്.പി കിരൺ മാത്യുവും.

 

“വെട്ടിക്കൊല്ലെടാ ഇവന്മാരെ”

 

കയ്യിലെ മുറിവമർത്തിപ്പിടിച്ച് ഒരുത്തൻ അലറി. അത് കേൾക്കേണ്ട താമസം ഒരുത്തൻ ഇന്നോവയുടെ പിന്നിലെ ഡോർ തുറന്ന് വാളുമെടുത്ത് അവർക്ക് നേരെ കുതിച്ച് ചെന്നു. പക്ഷേ അവരിരുവർക്കും യാതൊരു കുലുക്കവുമില്ലായിരുന്നു. വാളുമായി അവർക്കരികിലെത്തിയ അവന് തൻറെ വയറിലൂടെ ഒരു മിന്നൽ കടന്ന് പോയ പോലെ തോന്നി. ശരീരത്തിലേക്ക് പടർന്ന വേദന എന്താണെന്ന് തിരിച്ചറിയും മുന്നേ സതീഷ് ബോസിൻറെ ചുരുട്ടിപ്പിടിച്ച മുഷ്ടി ഇരുമ്പുകൂടം കണക്കെ നെഞ്ചിൽ പതിഞ്ഞു. അയാൾ പിന്നിലേക്ക് വീണു പിടഞ്ഞു. ഏതാനും സെക്കൻറുകൾക്കുള്ളിൽ ആ പിടച്ചിലവസാനിച്ചു. അപ്പോഴും ആ ഡ്രൈവറിൻറെ വലം കൈയ്യിൽ നീട്ടിപ്പിടിച്ചിരിക്കുന്ന വടിവാളിൽ നിന്നും കൊഴുത്ത ചോര ഇറ്റിറ്റ് വീഴുന്നുണ്ടായിരുന്നു. ഇടികൊണ്ട് അവശരായി നിന്ന മറ്റ് രണ്ട് പേരുടെ അരികിലേക്ക് കിരൺ മാത്യു പാഞ്ഞടുത്തു. കിരണിൻറെ കൈയ്യിലിരുന്ന വാക്കിംഗ് സ്റ്റിക്ക് ക്ഷണനേരം കൊണ്ട് വടിവാളായി മാറിയിരുന്നു. കഴുത്തിലെ ഞരമ്പ് മുറിഞ്ഞ് രണ്ട് പേരും തറയിൽ കിടന്ന് പിടഞ്ഞു. അപ്പോഴേക്കും പാമ്പിൻ വിഷം പ്രവർത്തിച്ച് തളർച്ച തോന്നിത്തുടങ്ങിയ രണ്ടു പേർ ജീവനു വേണ്ടി യാചിക്കുവാൻ തുടങ്ങി. ഹോസ്പിറ്റലിലെത്തിക്കാൻ പറഞ്ഞ് കെഞ്ചിക്കരയാൻ തുടങ്ങി. അത് കണ്ട് ആസ്വദിക്കുന്ന പോലെ അവരിരുവരും അമ്പാസിഡറിൻറെ ബോണറ്റിൽ ചാരി നിന്നു. പിന്നെ പതിയെ നടന്ന് അവർക്കരികിലെത്തി. സതീഷ് തൻറെ കയ്യിലെ വടിവാൾ ഒരുത്തൻറെ നെഞ്ചിൽ മുട്ടിച്ച് പിടിച്ചു.

 

“എത്രയോ പേർ നിൻറെയൊക്കെ മുന്നിൽ നിന്ന് ജീവന് വേണ്ടി യാചിച്ചിട്ടുണ്ട് ഇതുപോലെ, അപ്പോഴൊക്കെ ആർത്തട്ടഹസിച്ചിട്ടില്ലേ നീയൊക്കെ, ഇപ്പോഴെന്തേ യാചന..... നിൻറെയൊക്കെ കരച്ചിലും പ്രാർത്ഥനയും കണ്ട് അലിഞ്ഞ് മാപ്പ് നൽകുന്ന  ദൈവപുത്രൻമാരോ മാലാഖമാരോ അല്ല ഞങ്ങൾ, ഞങ്ങൾ ചെകുത്താൻമാരാണ്, രാക്ഷസന്മാർ...... നിങ്ങൾ കേട്ടിട്ടില്ലേ രാവണനെന്ന് രാക്ഷസ്സരാജൻ.... പത്ത് തലകളൊക്കെയായി....... ഇതും അതുപോലെയൊരു രാക്ഷസ്സൻ”

 

അത്രയും പറഞ്ഞ് സതീഷ് ഉറക്കെ ചിരിച്ചതും കയ്യിലെ വടിവാൾ ആ ഗൂണ്ടയുടെ നെഞ്ചിൽ തറഞ്ഞ് കയറിയതും ഒരേ സമയത്താണ്. അത് കണ്ട രണ്ടാമൻ ഭയന്നോടാൻ തുടങ്ങി. പക്ഷേ അവൻറെ മുതുകിലൂടെ കിരണിൻറെ കൈയ്യിലിരുന്ന വടിവാൾ തുളഞ്ഞ് കയറി. അവരുടെ പിടച്ചിൽ കണ്ടാസ്വദിച്ച സതീഷ്  അതിലൊരുവൻറെ ഫോൺ പോക്കറ്റിൽ നിന്നുമെടുത്ത് 100 എന്ന നമ്പർ ഡയൽ ചെയ്തു. കോൾ കണക്ട് ആയപ്പോൾ ഇത്രമാത്രം പറഞ്ഞു.

 

“കൊല്ലം ബൈപ്പാസിൽ കുരീപ്പുഴ പാലത്തിനടുത്ത് ഒരു പോലീസുകാരനെ കുറേ ഗുണ്ടകൾ സംഘം ചേർന്നാക്രമിക്കുന്നു. വേഗം വന്ന് രക്ഷിക്കണേ”

 

ഫോൺ കട്ട് ചെയ്ത സതീഷ് ഒരു ചെറു ചിരിയോടെ ഫോൺ ദൂരെ കായലിലേക്കെറിഞ്ഞു. ശേഷം അവരിരുവരും കാറിൽ കയറി,  കാർ ഓടിച്ചുപോയി.

 

*****************

 

തലകീഴായി മറിഞ്ഞ കാറിനുള്ളിൽ നിന്നും പുറത്തേക്കിറങ്ങൻ കഴിയാതെ ബാസ്റ്റിൻ വിഷമിച്ചു. കാലെവിടെയോ കുടുങ്ങിക്കിടക്കുകയാണ്.  എന്താണ് സംഭവിച്ചതെന്ന് അയാൾ ഓർത്തെടുക്കുകയായിരുന്നു. വിജനമായ മുന്നിൽ നീണ്ടുനിവർന്ന് കിടക്കുന്ന ബൈപ്പാസ്, തെരുവുവിളക്കുകളില്ലായിരുന്നു. മുന്നിലെ പാലത്തിൽ മാത്രമാണ് വെളിച്ചമുണ്ടായിരുന്നത്.  നല്ല സ്പീഡിലാണ് വണ്ടിയോടിച്ച് വന്നത് പെട്ടെന്ന് ഫ്രണ്ടിലെ ടയർ പൊട്ടി നിയന്ത്രണം പോയി, വണ്ടി വശത്തെ താഴ്ചയിലേക്ക് മറിഞ്ഞ് പോവുകയായിരുന്നു. കാലിലെ  വേദന ശരീരമൊന്നാകെ പടരുന്നുണ്ട്, എവിടൊക്കെയോ ഇടിച്ച് ചതഞ്ഞ് വേദന, ഒരു കൈ അനക്കാനാവാത്ത വിധം വേദനയുണ്ട്, ആ കൈയ്യിലെ എല്ലൊടിഞ്ഞ് മാംസത്തിലേക്ക് തറച്ചിരിക്കുകയാണ്.

 

   നേർത്ത നിലാവെളിച്ചത്തിൽ  തൻറെ അരികിലേക്ക് രണ്ട് പേർ വരുന്നത് ബാസ്റ്റിൻ കണ്ടു, അപകടം കണ്ട് രക്ഷിക്കാൻ വരുന്നവരാണെന്ന് കരുതി ആശ്വസിച്ച ബാസ്റ്റിൻ കണ്ടത് അവരിരുവരുടെയും കൈയ്യിലെ തോക്കുകളാണ്.  ക്രൂരമായ ചിരിയോടെ നടന്നടുക്കുന്ന അവരെ കണ്ടപ്പോൾ ബാസ്റ്റിന് തനിക്ക് യഥാർത്ഥത്തിൽ എങ്ങനെയാണ് അപകടം പറ്റിയതെന്ന് മനസിലായി. അവരുടെ ബുള്ളറ്റുകൾ തൻറെ വണ്ടിയുടെ മുൻചക്രങ്ങൾ തകർത്തിരിക്കുന്നു.

 

  അടുത്തേക്ക് വന്ന അവരിലൊരാൾ ബാസ്റ്റിൻറെ അരികിൽ ഇരുന്നു. മറ്റേയാൾ വണ്ടിയിൽ എന്തോ പരതുകയായിരുന്നു. അരികിലിരുന്നത് എ.സി.പി ശ്യാം മാധവാണെന്ന് ബാസ്റ്റിനറിയാമായിരുന്നു. മുൻപ് ശ്യാം തൃശ്ശൂർ ജോലി ചെയ്തിരുന്ന സമയത്ത് ഒന്നു രണ്ട് തവണ ഉരസിയതിൻറെ കേടുപാടുകൾ ഇപ്പോഴും ബാസ്റ്റിൻറെ ദേഹത്തുണ്ടായിരുന്നു.

 

“സർ, പ്ലീസ്...... എന്താണ് നിങ്ങൾ ചെയ്യുന്നത്? എന്താണ് നമ്മൾ തമ്മിലുള്ള പ്രശ്നം? എന്തിനാണെന്നെ?....”

 

വേദന കടിച്ചമർത്തിയുള്ള ബാസ്റ്റിൻറെ ചോദ്യങ്ങളെ ചുണ്ടിലേക്ക് തോക്ക് മുട്ടിച്ച് ശ്യാം നിശബ്ദമാക്കി.

 

“മോനേ ബാസ്റ്റിനേ..... ഒത്തിരി ചോദ്യങ്ങളൊന്നും വേണ്ട അങ്ങോട്ടും ഇങ്ങോട്ടും..... ഒറ്റ ചോദ്യം? അതിൻറെ ഉത്തരം നീ പറയണം... അത് മാത്രം..... നിന്നെ തിരുവനന്തപുരത്തേക്ക് വിളിച്ച്  എന്താണ് ഷൺമുഖൻ പ്ലാൻ ചെയ്യുന്നത്?”

 

സത്യത്തിൽ എന്താണ് ഷൺമുഖൻറെ പ്ലാൻ എന്ന് ബാസ്റ്റിനുമറിയില്ലായിരുന്നു ചെല്ലാൻ പറഞ്ഞാൽ ചെല്ലണം അങ്ങോട്ട് വിശദീകരണം ചോദിക്കുന്നത് ഷൺമുഖനിഷ്ടവുമല്ല.

 

“എനിക്കറിയില്ല സാർ... ഞാൻ”

 

തുടർന്നെന്തെങ്കിലും പറയും മുൻപ് സൈലൻസർ ഘടിപ്പിച്ച ശ്യാമിൻറെ തോക്കിലെ ബുള്ളറ്റ് ബാസ്റ്റിൻറെ തലയോടിനുള്ളിലൂടെ കടന്ന് പോയിക്കഴിഞ്ഞിരുന്നു.

 

ശ്യം എണീറ്റു.

 

“എന്തായി അൻവർ ? കിട്ടിയോ?”

 

 അപ്പോഴേക്കും വണ്ടിയിൽ നിന്നും സി.സി.റ്റി.വി ഫൂട്ടേജടങ്ങിയ ഹാർഡ് ഡിസ്ക്ക് കണ്ടെത്തിയ അൻവർ അതുമായി ശ്യാമിനു മുന്നിലെത്തിയിരുന്നു.

 

“സോ വീ ഷാൾ ഗോ”

 

ഒരു പുഞ്ചിരിയോടെ അൻവറിൻറെ തോളത്ത് തട്ടിയ ശേഷം ശ്യാം മുന്നേ നടന്നു, അവർ ബോട്ടിൽ കയറി

 

****************

 

ബാസ്റ്റിൻ ജോൺ കൊല്ലപ്പെട്ട വാർത്ത ഷൺമുഖൻ ഇതിനോടകം അറിഞ്ഞ് കഴിഞ്ഞിരുന്നു. ബാസ്റ്റിൻ ജോൺ മാത്രമല്ല, ബൈപ്പാസിൽ മറ്റൊരിടത്ത് നടന്ന ഏറ്റുമുട്ടലിൽ മറ്റ് ആറ് ഗൂണ്ടാസംഘാംഗങ്ങൾ കൂടി കൊല്ലപ്പെട്ടിരിക്കുന്നു. തലയ്ക്ക് മാരകമായി പരിക്കേറ്റ നിലയിൽ ഡി.വൈ.എസ്.പി ഹരീഷിനെ ആശുപത്രിയിൽ അഡ്മിറ്റ് ചെയ്തിരിക്കുകയുമാണ്. ശരിക്കും എന്താണ് സംഭവിച്ചതെന്ന് പോലീസിന് ഒരു തുമ്പും കിട്ടിയില്ല.

 

 ബാസ്റ്റിനെ ഹരീഷ് പിന്തുടരുകയായിരുന്നു അപ്പോൾ ബാസ്റ്റിനോ അയാൾ ചുമതലപ്പെടുത്തിയ ഗുണ്ടകളോ ആയിരിക്കാം ഹരീഷിനെ ആക്രമിച്ചിരിക്കുക. പക്ഷേ അതേ ബാസ്റ്റിനും സംഘവും ആക്രമിക്കപ്പെട്ടിരിക്കുന്നു, അതെങ്ങനെ ? ആര് ചെയ്തു? എന്തിന് ചെയ്തു? ഗുണ്ടാ സംഘങ്ങൾ തമ്മിലുള്ള കുടിപ്പക തീർത്തതാവുമോ? ഉമയുടെ മനസിൽ ചോദ്യങ്ങളുടെ ഒരു വേലിയേറ്റം തന്നെയുണ്ടായി. ഇടയ്ക്ക് ബോധം വന്ന ഹരീഷിൽ നിന്നും വ്യക്തമായ ഒരു വിവരവും കിട്ടിയതുമില്ല. തൻറെ സൈന്യത്തിലെ കരുത്തനായ ഒരു പോരാളി വീണു പോയത് ഉമയെ ചിന്താധീനയാക്കി. തൻറെ ആവശ്യപ്രകാരം അമ്മാവനും ആഭ്യന്തര മന്ത്രിയുമായ ദിനകരൻ പാറക്കുന്നേൽ വളരെ രഹസ്യമായി നടത്തിയ അന്വേഷണത്തിന് ശേഷം കണ്ടെത്തിയതാണ് മിടുക്കരായ ടീം മെമ്പേഴ്സിനെ, അതിലെ ഏറ്റവും മിടുക്കനാണ് ഇന്ന് വീണുപോയിരിക്കുന്നത്. തലയ്ക്കേറ്റ മാരകമായ പരിക്ക് അദ്ദേഹത്തെ കുറച്ചധികം കാലത്തേക്കെങ്കിലും കിടക്കിയിൽ തളച്ചിടുമെന്നാണ് ഡോക്ടർ പറഞ്ഞിരിക്കുന്നത്.

 

ഓഫീസിന് പുറത്ത് യുവനേതാവ് അഭിറാം ഡി പി യുടെ നേതൃത്വത്തിൽ പ്രതിഷേധ പ്രകടനം നടക്കുന്നുണ്ടായിരുന്നു. ആഭ്യന്തര മന്ത്രി ദിനകരൻ പാറക്കുന്നേലിനെ പച്ചയ്ക്ക് തെറി വിളിക്കുന്നത് പോലെയായിരുന്നു മുദ്രാവാക്യം വിളികൾ. ഒരു എം.എൽ.എ പോലുമല്ലെങ്കിലും സോഷ്യൽ മീഡിയായിലെ നിറസാന്നിദ്ധ്യവും ആദർശ ധീരനും അധികാര രാഷ്ട്രീയത്തോട് തെല്ലും താല്പര്യവുമില്ലാത്ത അഭിറാമിൻറെ പിന്നലെപ്പോഴും യുവാക്കളുടെ ഒരു വലിയ കൂട്ടംമുണ്ട്. മാത്രമല്ല രാഷ്ട്രീയപ്പടക്കളത്തിലെ ഗ്ലാമർ താരമായ അഭിറാമിന് ആരാധകരായി പെൺകുട്ടികളുടെ ഒരു പട തന്നെയുണ്ട്.  അത് ഭരണ മുന്നണിയെയും പ്രതിപക്ഷത്തേയും ഒരേ പോലെ പ്രശ്നത്തിലാക്കുന്നുണ്ട്. അഭിറാം ശരിക്കും ഇരുപക്ഷത്തുമില്ല. ഒറ്റയാനായി അഴിമതിക്കെതിരേയും കെടുകാര്യസ്ഥതയ്ക്കെതിരേയും ശബ്ദമുയർത്തുകയാണ്. ഈയിടെയായി അഭിറാമിൻറെ ആക്രമണം മുഴുവൻ സംസ്ഥാന ആഭ്യന്തര മന്ത്രി ദിനകരൻ പാറക്കുന്നേലിനെതിരേയാണ്. അയാളുടെ മനോഹര ശബ്ദം ഉച്ചഭാഷിണിയിൽ മുഴങ്ങി. ഉമ തൻറെ മുറിയിലെ ജനാലയിലെ കർട്ടൻ മാറ്റി അത് നോക്കി നിന്നു.

 

“പ്രിയപ്പെട്ട നാട്ടുകാരെ ഈ നാട്ടിലെന്താണിപ്പോൾ നടന്നുകൊണ്ടിരിക്കുന്നത്. ഇവിടെ ജനങ്ങളുടെ സുരക്ഷയ്ക്ക് നിയോഗിക്കപ്പെട്ടിരിക്കുന്ന പോലീസുകാർ പ്രാണഭയത്താൽ ഉറക്കമില്ലാത്ത രാവുകൾ തള്ളിനീക്കുകയാണ്. കഴിഞ്ഞ പതിനഞ്ച് ദിവസത്തിനിടയിൽ 10 പോലീസുകാരെയാണ് ഏതോ അജ്ഞാത സംഘം തട്ടിക്കൊണ്ട് പോയത്. അതിൽ ആദ്യത്തെ നാല് പേർ കൊല്ലപ്പെട്ടുവെന്ന് പോലീസ് തന്നെ സ്ഥിതീകരിച്ചു. രണ്ട് പേരുടെ ചിതാഭസ്മം മാത്രമാണ് കിട്ടിയത്. ബാക്കിയുള്ളവരുടെ ശവം പോലും കിട്ടില്ലെന്ന് ഭീഷണി മുഴക്കിയ നിഖിൽ രാമനെന്നൊരാളിൻറെയും ശവം കിട്ടി. പിന്നെ കാണാതായത് പ്രശസ്തയായ ഫോറൻസിക് സർജൻ അൻസിയ റഹ്മാനെയും ഇൻവെസ്റ്റിഗേറ്റീവ് ജേർണലിസ്റ്റ് ജെറാൾഡ് സേവ്യറിനെയുമാണ്. കൃത്യമായ ഇൻറലിജൻസ് റിപ്പോർട്ടുകളുണ്ടായിട്ടും അവയൊക്കെ അവഗണിച്ച് മിടുക്കന്മാരായ കുറച്ച് പോലീസ് ഉദ്യോഗസ്ഥരെ കൊലയ്ക്ക് കൊടുത്ത ആഭ്യന്തര മന്ത്രി ആ സ്ഥാനത്തിരിക്കാൻ അർഹനല്ല. അൽപമെങ്കിലും നാണമുണ്ടെങ്കിൽ രാജി വച്ചിട്ടിറങ്ങിപ്പോകണം. അധികാരത്തിൻറെ അപ്പക്കഷ്ണത്തിൽ മരണം വരെയും കടിച്ചു തൂങ്ങിക്കിടക്കുന്ന ഇത്തരം കിഴവന്മാർക്ക് ഭരിക്കാനറിയില്ല. കട്ട് മുടിക്കാൻ മാത്രമേ അറിയൂ. ആഭ്യന്തര മന്ത്രി രാജി വയ്ക്കും വരെ ഈ പ്രക്ഷോഭ പരിപാടികൾ തുടരും……”

 

ഉച്ചവെയിലിനെ വകവയ്ക്കാതെ അഭിറാം കത്തിക്കയറുകയായിരുന്നു.  

 

“എക്സ്ക്യൂസ്മി മാഡം ഒരാൾ മാഡത്തിനെ കാണണമെന്ന് പറഞ്ഞ് വെയിറ്റ് ചെയ്യുന്നു”

 

 

“ ആരാണ് ദീപിക കാണാൻ വന്നിരിക്കുന്നത്?”

 

ദീപിക വന്ന പറഞ്ഞത് കേട്ട് അഭിറാമിൻറെ പ്രസംഗമുപേക്ഷിച്ച് ഉമ തൻറെ സീറ്റിലേക്ക് വരുന്നതിനിടയിൽ ചോദിച്ചു.

 

“ഒരു സമീർ, തൃശ്ശൂർ നിന്നാണ് വന്നിരിക്കുന്നത്. മാഡത്തിനോട് നേരിട്ടൊന്ന് സംസാരിക്കണം, മാഡത്തിന് പരിചയമുള്ള ആളാണ് പേര് പറഞ്ഞാൽ മതിയെന്ന് പറഞ്ഞു.”

 

ദീപിക പറഞ്ഞത് കേട്ട് ഉമ തൻറെ ഓർമ്മയിൽ സമീർ എന്നൊരു പേര് പരതി. പക്ഷേ അങ്ങനെയൊരാളെ ഓർത്തെടുക്കാൻ കഴിഞ്ഞില്ല.

 

“എന്തായാലും വരാൻ പറയൂ...... “

 

ദീപിക അയാളെ കൂട്ടിക്കൊണ്ട് വരാൻ പോയപ്പോഴും ഉമ ആരാണ് തനിക്കറിയാവുന്ന സമീർ എന്ന ആലോചനയിലായിരുന്നു.

 

“ഗുഡ് ആഫ്റ്റർനൂൺ മാഡം”

 

സമീറിൻറെ മുഖം തൻറെ ഓർമ്മയുടെ കോണിലെവിടെയോ പൊടിപിടിച്ച് കിടക്കുന്നതാണെന്ന് ഉമയ്ക്ക് തോന്നി, പക്ഷേ പരതിയെടുക്കാനുള്ള മനസിൻറെ ശ്രമം വിഫലമായി. അയാൾ വലിയ പരിചിത ഭാവത്തിലാണ് നിൽക്കുന്നതും.

 

“സമീർ ഇരിക്കൂ.. “ ഉമ മുന്നിലെ കസേരയിലേക്ക് കൈ ചൂണ്ടി, സമീർ അതിലിരുന്നു. ഉമയുടെ നോട്ടത്തിൽ നിന്നും അവർക്ക് തന്നെ തിരിച്ചറിഞ്ഞിട്ടില്ലെന്ന് സമീറിന് മനസിലായി.

 

“മാഡം എന്നെ മറന്നുവല്ലേ..... അല്ലെങ്കിലും സർവ്വീസ് ജീവിതത്തിൽ കണ്ടുമുട്ടിയ ക്രിമിനൽസിനെയെല്ലാം ഓർത്തിരിക്കേണ്ട ബാദ്ധ്യത പോലീസുകാർക്കില്ലല്ലോ... അല്ലേ...... “

 

സമീറിൻറെ മുഖത്ത് ജാള്യത കലർന്ന ഒരു പുഞ്ചിരിയുണ്ടായിരുന്നു.

 

“ക്ഷമിക്കണം സമീർ നിങ്ങളെ എവിടെയോ കണ്ട് നല്ല പരിചയമുണ്ട് പക്ഷേ കൃത്യമായി ഓർത്തെടുക്കാൻ കഴിയുന്നില്ല.” ഉമ കാര്യം തുറന്ന് പറഞ്ഞു

 

“മാഡം പണ്ട് ഒരു കഞ്ചാവ് കേസിൽ അറസ്റ്റ് ചെയ്തിട്ടുണ്ട് എന്നെ. ഇവിടെ തിരുവനന്തപുരത്ത് കോളേജിൽ പഠിക്കുകയായിരുന്നു അന്ന് ഞാൻ. മാഡത്തിൻറെ കൈയ്യീന്ന് കുറേ തല്ല് കിട്ടിയിട്ടുണ്ട്, ഒത്തിരി ഉപദേശവും. എന്നിട്ട് അന്ന് മാഡം കേസ് ചാർജ്ജ് ചെയ്യാതെ വീട്ടുകാരെ വീളിച്ചുവരുത്തി എന്നെ നിർബന്ധപൂർവ്വം ഡി അഡിക്ഷൻ സെൻററിലാക്കി. കുറച്ച് ദിവസത്തെ ചികിത്സയ്ക്ക് ശേഷം അവിടുന്ന് ഡിസ്ചാർജ്ജ് ആയ ദിവസവും മാഡം എന്നെ കാണാൻ വന്നിരുന്നു. അന്നും കുറേ ഉപദേശിച്ചു. ഇനി ചീത്ത കൂട്ടുകെട്ടിലൊന്നും ചെന്ന് ചാടരുതെന്ന്”

 

സമീറിൻറെ കണ്ണു നിറഞ്ഞിരുന്നു. ഉമയ്ക്ക് ആ സംഭവങ്ങൾ വേഗം ഓർമ്മ വന്നു, അന്ന് തൻറെ മുന്നിലിരുന്ന കരഞ്ഞ ആ കൊച്ച് പയ്യനാണിതെന്ന് ഉമ തിരിച്ചറിഞ്ഞു.

 

“ ഓ സോറി ശരിക്കും ഞാൻ തന്നെ മറന്ന് പോയി..... പൊതുവേ ഞാനങ്ങനെ ആൾക്കാരെ മറക്കാത്തതാണ്, പക്ഷേ ഇതെന്ത് പറ്റിയെന്ന് അറിയില്ല..... വൺസ് എഗെയ്ൻ സോറി..... അല്ല ഇപ്പോ എന്തിനാണ്  സമീർ എന്നെ കാണാൻ വന്നത്?”

 

“പഠിച്ച് രക്ഷപെട്ടതൊന്നുമില്ല മാഡം, പിന്നെ അച്ഛൻ നാട്ടിലൊരു മെൻസ് വെയർ ഷോപ്പ് ഇട്ടു തന്നു, അതുമായി അല്ലലില്ലാതെ ജീവിച്ച് പോവുകയാണ്.  ഇപ്പോ കുറച്ച് പോലീസുകാരെ കാണാതായതും ശിവലാൽ ഷെട്ടിയുടെ മരണവും ഒക്കെ മാഡമല്ലേ അന്വേഷിക്കുന്നത്.... അതുമായി ബന്ധപ്പെട്ട ഒരു കാര്യം എനിക്ക് മാഡത്തിനോട് പറയാനുണ്ട്.... അതിനാ ഞാനിപ്പോ വന്നത്, അവിടെ നാട്ടിലെ പോലീസിനോട് പറഞ്ഞാൽ അപകടമാണെന്നൊരു തോന്നൽ... പിന്നെ മാഡത്തിനെ അറിയാമെന്ന ധൈര്യത്തിലലും എനിക്ക് മാഡം ആപത്തൊന്നും ഉണ്ടാക്കില്ലെന്ന് വിശ്വാസത്തിലുമാണ് ഇങ്ങോട്ട് വന്നത്”

 

കേസുമായി ബന്ധപ്പെട്ട കാര്യമാണെന്നറിഞ്ഞതോടെ അതെന്താണെന്ന് കേൾക്കാനുള്ള ആകാംക്ഷയായി ഉമയ്ക്ക്.

 

“എന്താണ് സമീറേ കാര്യം..... നീ ധൈര്യമായി പറഞ്ഞോളൂ, അതു മൂലം നിനക്കൊരു പ്രശ്നവുമുണ്ടാകില്ല, അത് ഞാനുറപ്പ് തരാം”

 

“ തൃശ്ശൂര് എൻ.എച്ച്.സൈഡിൽ പെരിഞ്ഞനം ഭാഗത്താണ് എൻറെ ഷോപ്പ്, അവിടെ റോഡിൽ കുറച്ച് പണികൾ നടക്കുന്നുണ്ടായിരുന്നു.  കഴിഞ്ഞ ദിവസം ബാസ്റ്റിൻ ജോൺ എന്ന കുപ്രസിദ്ധ ഗൂണ്ട കടയിൽ വന്ന് സിസിറ്റിവി ഫൂട്ടേജ് കാണണമെന്ന് ആവശ്യപ്പെട്ടു. അയാളാളൊരു ഡെയ്ഞ്ചറാണ് മാഡം, അനുസരിക്കാതിരുന്നാൽ തല കാണില്ല. അയാൾ പരിശോധിച്ചത് കാസർഗോഡ് നിന്ന് ശിവലാൽ ഷെട്ടിയുടെ ബോഡി കിട്ടിയതിൻറെ തലേ ദിവസത്തെ വിഷ്വൽസായിരുന്നു. അതിൽ ഒരു ഫോർഡ് എൻഡവറിൻറെയും തൊട്ട് പിന്നാലെയൊരു ബ്ലാക്ക് സ്കോർപ്പിയോയുടെയും വിഷ്വൽ വന്നപ്പോൾ അത് ഫ്രീസ് ചെയ്യാൻ പറഞ്ഞു. പിന്നെയത് സൂം ചെയ്ത് പരിശോധിച്ചിട്ട്, എൻറെ സിസ്റ്റത്തിൻറെ ഹാർഡ് ഡിസ്ക് സഹിതം അയാൾ കൊണ്ട് പോയി.... ഈ വിഷയം ആരോടേലും പറഞ്ഞാൽ തല കാണില്ലെന്ന് ഭീഷണിപ്പെടുത്തിയിട്ടാണ് പോയത്. അയാൾക്ക് പോലിസിൽ പോലും കൂട്ടുകക്ഷികളുണ്ടെന്നത് പരസ്യമായ രഹസ്യമാണ് അതു കൊണ്ട് തന്നെ അതേപ്പറ്റി ആരോടും പറയുന്നില്ലെന്ന് കരുതി.”

 

അത് പറയുമ്പോൾ സമീറിൻറെ മുഖത്ത് ഭയമുണ്ടായിരുന്നു.

 

“പിന്നെ ഇപ്പോഴെന്താണ് പറയാൻ കാരണം, ബാസ്റ്റിൻ ജോൺ കൊല്ലപ്പെട്ടതുകോണ്ടാണോ?”

 

“അതുമൊരു കാരണമാണ് മാഡം, ഇന്നലെ രാത്രി അയാളെ ആരോ കൊന്നുവെന്ന് വാർത്ത കണ്ടു, പിന്നെ അതിനേക്കാൾ വലിയൊരു കാര്യം കൂടിയുണ്ട് മാഡം, ആ വിഷ്വൽസ് സൂം ചെയ്തപ്പോൾ കാറിൻറെ മുൻസീറ്റിലിരിക്കുന്ന ആളിനെ ഞാൻ കണ്ടിരുന്നു. അതൊരു സ്ത്രീയായിരുന്നു. അവരെയെനിക്കറിയാം. അത് അഞ്ജനയാണ്. ഒരു റേപ്പ് വിക്ടിമാണ് ആ പെൺകുട്ടി, കേസിലെ പ്രതികളെല്ലാം ഉന്നതന്മാരായത് കൊണ്ട് തന്നെ പോലീസ് തേച്ച്മാച്ച് കളഞ്ഞ ഒരു കേസിലെ ഇരയായ പെൺകുട്ടി, അവളെ പീഡിപ്പിച്ചവരിൽ ഒരു പോലീസുകാരനുമുണ്ടായിരുന്നതായി കേട്ടിട്ടുണ്ട്, കോല്ലപ്പെട്ട ഡി.വൈ.എസ്.പി രാജൻ ജോൺ. ആദ്യം ആ റേപ്പ് കേസ് അന്വേഷിച്ചത് എ.സി.പി ശ്യാം മാധവ് സാറായിരുന്നു. ആയിടക്ക് സാറിന് നേരേ ഗുണ്ടാ ആക്രമണമുണ്ടായപ്പോൾ കേസന്വേഷണം തുടർന്ന് നടത്തിയത് എസ്.പി സതീഷ് ബോസ് സാറാണ്. ശ്യം മാധവും സതീഷ് ബോസും ആ കേസ് തേച്ച് മാച്ച് കളഞ്ഞ് ആ പെൺകുട്ടിക്ക് കിട്ടേണ്ടിയിരുന്ന നീതി നിഷേധിച്ചവരാണെന്ന് ഞാൻ കേട്ടിട്ടുണ്ട്.”

 

തുടരും....

Click here for next part >>